Ka jingiakhih kan ym kut tang ha Mawkyrwat kan bteng ha Shillong:KSU

U samla Donald bad kiba iaid rally.

Maham ka KSU ïa ki bar jylla ba iap u samla Wahkaji

Mawkyrwat, Lber 31: Da ki spah ngut ki briew napoh South West Khasi Hills District kynthup naduh ki longkmie bad ki samla kynthei bad shynrang ha ka Sngi Balang ki la ia mih ban iashimbynta ha ka jingiaid paitbah (public rally) ban pyrshah halor ka jingshah thombor bad ka jingshah pyniap dusmon jong uwei u samla na ka shnong Wahkaji ha Golflink, Shillong dang shen.

Kane ka jingiaid paitbah ka la sdang na lad ophis Block ha Mawlangwir sha Dak Bangla bad wanphai ha Iew Mawkyrwat. Ki nongiashimbynta ha ka jingiakhih paitbah ki la pyrta ia ki jingpyrta ban dawa ia ka hok halor ka jingshah pyniap dusmon jong utei u samla uba la tip kyrteng kum u Phershanroy Myrthong bad ki la pynrem jur ia ka Sorkar Jylla halor ka jingshah shiliang ia ki bar jylla bad ka jingbym lah ban kem ia ki briew kiba pyniap ia une u samla, kiba la kynnoh ba kidei ki bar jylla.

Haba kren ha ka jingialang, u General Secretary ka KSU Seng Kmie, u samla Donald V Thabah u la pynrem jur halor ka jinglehsting jong ka Sorkar lyngba ka tnat Pohiing ban wad ia ki briew ba donkti ha ka jingshoh bad jingpyniap ia une u samla na Wahkaji ha kaba haduh mynta la shi taiew tam kim pat ioh kem iano iano, hynrei lada jia eiei pat ia ki bar Jylla, tang hapoh shi kynta ar kynta ki la kem bad shon dur da kaba pharep ia ki dkhot jong ka KSU bad kiwei pat ki sengbhalang.

Kumta, u samla Donald u la kyntu ia ki samla ka Jaitbynriew ban pynim pat ia ka rukom treikam ha ki snem 1990 ter ter ha kaba lada jia ba don kino kino ki jingshah shoh bad shah jrong kti jong ki samla Khasi, baroh ki shi shnong ki iamih paitbah ban wad ia kita ki nongleh bad ban ai jingsneng syndon da kaba tyngeh. “Mynshwa ym ju don ba ujor FIR, ngi leit wad hi (ia ki briew ba donkti), hynrei mynta pat wat ynda la ujor FIR ruh ym don ba kem. Kumta, ka por ka la dei ban pynim biang ia kane ka rukom leh ba mynshwa bad lada jia ba u samla na Wahkaji ne Mawkyrwat uba wan kamai kajih ha Shillong bad shah shoh ha ki mynder ri ha Shillong, wan baroh shi shnong sha Shillong bad ngi ruh na Shillong ngin mih lang bad ngin pynlong ia ka jingiakhih paitbah,” ong u samla Donald.

U samla Donald u la ai ruh ka khubor jingmaham ba tyngeh sha ki dkhar da kaba ong, “Namar ba ka ain kam treikam ia u poiei ha kaba haduh mynta ym pat don uwei ruh uba shah kem (halor kane ka jingjia), kumta kane kadei ka khubor sha ki poiei ba wan wad kamai kajih bad wan trei wan ktah hangne ha Ri jong ngi ba ‘phi la leh katto, ma ngi ngin ym sngap shuh; lada phi jrong kti ia u jong ngi, lada ngim ioh ia phi ngin leh ia u jait u kynja jong phi’,” ong u samla Donald Thabah.

Une u nongialam ka KSU u la kynthoh ruh ia ka sorkar da kaba ong, “Ngin peitkai kata ka Special Investigation Team (SIT) haduh katno kan lah. Hynrei ngan ong ia phi ba kane ka rally bad jingiakhih paitbah kan ym kut tang hangne ha Mawkyrwat hynrei kan bteng ruh hangtei ha Sor Shillong. Lada ka ain kam lah ban ai kata ka jingiada bad kata ka hok ia ka Jaitbynriew jong ngi bad ka iing ka sem u samla Phershanroy, ma ngi iwei pa iwei ngin ai. Kumta, long kiba la pynkhreh, kilan met ngin pynim biang ia kata ka rukom treikma ba mynshwa namar ha kano kano ka por ka thma ka lah ban wan bad ngi dei ban long kiba kloi ban aiti ia ka met bad mynsiem na ka bynta ka Ri bad ka Jaitbynriew”.

Na ka liang jong u Vice President ka FKJGP Seng Kmie, u samla Eldie N Lyngdoh u la kynthoh jur ia u Myntri ka tnat Pohiing, u Bah Lahkmen Rymbui uba la khot ia ki paitbah ba iohi halor ka jingjia ha Golflink ban wan shakhmat ban ujor, hynrei lada jia eiei pat ia ki poiei, ki pulit ki shu kem beit naphang ia ki dkhot sengbhalang khlem da sakhi satar la ki donkti ne em ha kata ka jingjia.

U samla Eldie u la ong, “Haduh mynta kine ki bar jylla ki ioh ia ka jingiada ba pura na ka sorkar jylla bad kan sa poi ka por ba kan sa long kumba jia ha Tripura ba kine ki bar Jylla kin sa wan sei ia nga ia phi na iing na iing da ka jingsynran lang ki pulit sorkar. Kumta, ieng samla ban ialeh na ka bynta ka dawbah jong ka lawei ka pateng ban wan”.

Une u nongialam ka FKJGP u la maham ruh ia ka Sorkar MDA da kaba ong, “Sorkar MDA wat tynjuh te wat tynjuh bad wat khein sting ia ka mynsiem ba la pait ba la mong bad ba la bitar jong u khun samla ka Ri uba la pun mynta ia ka jingbitar namar kine ki jingjia shah shoh bad shah pyniap ha ki mynder ri manla ka por, namar kan sa bthei ha kawei ka sngi bad sa shisien kan sa mih ka snam bad ka jingiaumsnam bad phin ym lah ban leh eiei. Ar ngut ki samla ka Ri ki la iap bad ngim pat iohi tang ka dak ba la kem bad pynshitom, phi la buh ia u paitbah ha ka umdum. Kynmaw ki samla ka bri u Hynniewtrep ki la long kiba peitngor bad kum u nongialam nga la iohi shai ia ka jingsat bad ka jingbitar jong ki hapoh ki social media bad kan ym slem shuh ba kan sa mih ka jingiaumsnam hapoh ka Ri jong ngi bad kane wat kynnoh ia ngi namar ba ngim shym sdang ma ngi”.

Previous articleDei pyrkhing ha ki jingïalap ilekshon kum ha Iing mane: AL Hek
Next articleKop u Conrad ka NPP kan wan biang ha ka bor ha GHADC