Ka jingbym biang ki surok ha khappud ka buh jingeh ïa ki BSF

Ka jingkynrei jong ki kam be-aiñ ha thaiñ khappud hapdeng ka India bad Bangladesh ka la nang jur katba dang ïaid ki por. Na ka bynta ban tehlakam ïa kine ki kam beain na ka liang ka Sorkar Jylla ka la ju buh ïa ka jingkyrpad ha khmat ka Sorkar Pdeng na ka bynta ban mang pisa ïa ki surok khappud kiba don ha ka thaiñ Dawki bad Bholaganj, Shella.

Kumba ka long mynta, bun na ki shnong kiba long markhap ka jaka khappud ka India bad Bangladesh kim don ïa ka surok kaba paka. Ka jingbymdon ka surok sha kine ki shnong ka la buh jingeh ïa ki shipai BSF namar kim lah ban ai por pahara sha kine ki jaka. Kane hi ka la ailad ïa ki riew sniew ban shim kabu ban leh ïa ka kam be-aiñ namar ki tip ba kin nym ngat ha ka shrip jong ki shipai. Ka long kaba eh ban tehlakam ïa ki kam beaiñ ha ki thaiñ khappud kiba kynthup ïa ka jingkhaïi be-aiñ, ki kam lute bad kiwei kiwei na ka daw ka jingbym biang ki surok. Ka jingshna bad jingpynbha ïa ki surok ha ki thaiñ border kan ïarap ïa ki shipai BSF ban pynkhlaiñ ïa ki bor pahara ha ki thaiñ khappud.

Na ka liang ki Shipai BSF na ka por sha ka por ki ju ban kuruip ïa ki tiar bad ki mar kiba thmu ban shalan beaiñ sha Bangladesh kiba kynthup ïa ki dieng sawdong, ki bilor kiad, ki masi bad kiwei ki jait tiar. Na ka liang ka BSU ki ju pynpaw halor ka jingdonkam ban ker sainar shiah ha lynter ki jaka khappud ban tehlakam ïa ki kam bad ki jingkhaïi beaiñ. Hynrei, na ka liang ki paidbah khappud ki la pynpaw ba kine ki jaka rep ha ki jaka khappud ki long ki jaka rep kiba bha bad ba seisoh bha bad tang shi (1) akar ki ju ïoh haduh kumba 12 byrni u kba ha ka shisnem bad lada dei shispah (100) akar ka dei da shisha ka jingïoh nong kaba khraw.

Kumta kane ka jingker sainar ha kine ki jaka khappud kala wanrah ka jingduh kaba khraw ïa ki paid nongrep lada kim ïoh shuh ban rep kumba ju ïoh mynshuwa. Lah ban kdew ba ka jingker sainar shiah ha khappud ka India-Bangladesh kaba la don kumba saw snem mynta kala ktah shibun eh ïa ki lyngkha jamin kaba hapoh hapoh kane ka thaiñ khappud, bad na ka liang jong ki bor shipai ruh kim shah shuh ïa ki nongrep kum ki Khasi, ki Garo, ki Hajong ban leit rep ha kito ki jaka kiba ki ju rep bad ju im naduh ki por kiba mynshuwa. Shuh shuh, na ka liang ka Coordination Committee on International Border (CCIB) ka ju pynpaw ïa ka jingpyrshah kaba jur halor ka jingthmu ka sorkar pdeng ban ker sainar shiah lane ki kynroh hapdeng u pud u sam ka India bad ka ri Bangladesh ba hap ha ki kahppud ka Meghalaya bad Bangladesh.

Kane ka jingpyrshah ka CCIB ïa kane ka jingthmu ban sdang noh ïa ka kam ban ker sainar shiah lane ki kynroh ha ki thaiñ khappud ka Meghalaya bad ka ri Bangladesh ka la mih hadien ba ka CCIB ka la ïoh jingtip ba ka sorkar pdeng ka la kubur ban pyntreikam noh ïa ka jingker ïa ki kynroh, kaba dei hadien ka jingtohkit (Survey) ba la pynlong da ki bor bahalor ka sorkar India bad ka sorkar Bangladesh. Hynrei haba ïadei bad ki jingjur ki kam beain ha ki jaka khappud la ïohi ba ka long kaba donkam ban pyndep ïa ka jingker sainar sh iah ha lynter ki jaka khappud.

Previous articlePynsangeh ka SSA baroh ki lympung ïalehkai phutbol mynta ka snem
Next articlePynsngew jingujor ka Ishika ba ïoh COVID-19 sha u DC bym biang ka hospital ha Nagoan