Ka ‘Facilitation Centre Covid’ ha Umling ka treikam ban lum jingtip ia ki bar jylla:Bah Prestone

Shillong Lber 24: U Symbud Myntri Rangbah ka jylla u Bah Prestone Tynsong, hynne ka sngi u la ong, ba ka Facilitation Centre kaba don ha Umling ka dei na ka bynta ka COVID hynrei la pyndonkam lang ia ka na ka bynta ban lum ia ki jingtip jong ki briew kiba wan rung shapoh ka jylla Meghalaya.

“Ka jingong u Myntri Rangbah ka jylla hapoh iing dorbar thawain ba ia mynta ka Entry/Exit Point ka long na ka bynta ka COVID-19 bad katei ka long kaba shisha, tangba ha kajuh ka por, ngi shim ia ka kabu ba kito kiba wan rung la kidei ki nongjngohkai ne ka jingkhmih ha kaba iadei bad ka COVID-19 hynrei la khmih ruh ia ki, hangno kin sah, katno sngi kin sah bad kumta ter ter” ong u Bah Prestone Tynsong. 

U Bah Prestone u la pynshai ba ha ka por jong ka sorkar kaba rim kaba la ialam da u Dr Mukul Sangma, ha ka Meghalaya Residents Safety and Security Act 2016 ym shym la kdew eiei iaka Facilitation Centre hynrei la kdew ia ka tang ha ka Rule bad dei halor kane ka nongrim ba ka sorkar kaba mynta kala pynkylla iaka Meghalaya Residents Safety and Security Amendment Bill 2020 da kaba pynrung ia ka kyndon ban buh iaka Entry/ Exit Point ne ka Facilitation Centre hapoh jong ka aiñ.

U la ong, ki sengbhalang ki dei ban iai ap, ba u Lat ka jylla un ai jingmynjur noh ia ka Meghalaya Residents Safety and Security Amendment Bill 2020 ba kan long ain noh khnang ba yn ioh pyntreikam noh ia ka Entry/Exit Point ne Facilitation Centre.

U Symbud Myntri Rangbah u la ong, ka iing dorbar thawain ka jylla hadien ba kala dep mynjur ia ka Meghalaya Residents Safety and Security Amendment Bill 2020 kala phah sha u Lat ka jylla ban ioh ia ka jingmynjur hynrei u Lat u la phah ia kane ka Amendment Bill sha ka Ministry of Home Affairs jong ka sorkar pdeng bad haduh mynta kane ka Bill ka dang sahteng ban ioh iaka jingmynjur.

U la ong, ka sorkar jylla ka dang iai buddien halor kane ka bynta bad ka Ministry of Home Affairs bad ma u ryngkat bad u Myntri Rangbah kila iakren ruh bad u Amit Shah ban pyllait noh ia katei ka Bill. 

Haba kylli la ka Facilitation Centre kam dei satia kata ka jaka kaban pyrkhing ei ei ia ka jingwan ki mynder ri, na ka liang u Bah Prestone u la ong, “Ka jingkylli halor ka mat jong ka jingwan kyrthep kam mih eiei, namar lada dei hi u nongshong shnong ka ri India, ha ka riti synshar jong ka ri ym lah ban khang iano iano ruh”.

Dang shen, ki nongialam sengbhalang ka jylla kila pynpaw ia ka jingbitar halor ka jingkam ka sorkar jylla ba ka Facilitation Centre ha Umling ka long thik tang ha kaba iadei bad ka COVID-19 ym ka Entry/Exit Poit ban pyrkhing ia ka rung ka mih jong ki briew kiba nabar.

Ki nongialam sengbhalang kila ong, ba ka sorkar jylla kala shukor ym tang ia kisengbhalang hynrei ia u paidbah ka jylla baroh kawei namar baroh shi katta ka sorkar ka pynbna ban plie iaka jaka ban pyrkhing ia ka jingrung ki briew kiba nabar ym ka jaka ban khmih bniah ia ki briew ha kaba iadei bad ka jinglong jingman ka khlam COVID-19 bad kila byrngem ruh ban lum kyrkieh iaka jingialang ban pynjur shuh shuh ia ki jingiakhih.

Previous articleShah siat u rangbah ha Nongsteng
Next articleYm tip lano un wan Shillong u Amit Shah, ngi la pynkynmaw bad ai jingthoh: Prestone