Jurip ki enjiniar, bor District bad Rangbah Shnong

Jowai, Nailur 15: Ka wah Myntdu ka bsa umbam umdih ia ka sor Jowai, hynrei ka tnat PHE lyngba ka ophis u SDO (PHE) Electrical Sub- Division Rymbai ka la shim nongmuna ha ka 13-07-2021, na Urkhla bad na ka dam Mupiah Jowai, ka la lap ba kam shngaiñ shuh ia u paidbah ban pyndonkam namar ka jingjaboh bad ktieh palat ka um. 
Hadien ba la mih kane ka kaiphod na ka liang ka “Khooid Yaka Wah Myntdu” ka la ujor sha u DC ka West Jaiñtia Hills na ka bynta ban don ka Joint Inspection ha kitei ki jaka, kumta hynne ka sngi ha ka jingialeh jurip ha ka jaka pyllang um ha Mupiah ba la donlang u P. Synnah EE PHE (Electrical) Jowai Division, u E.E Water Resources Jowai, u AS Mukhim ADC (MCS) WJH, u Waheh Chnong Khimusniang ryngkat ka seng “Khooid Yaka Wah Myntdu” ki lap ba la lang ktieh lang shyiap haka dam Mupiah.
U P.Synnah E.E PHE (Electrical) Jowai Division u ong ba ka jingshahktah ka wah ka shait jia beit tang shu wan u slap namar ba ka um slap ka rah lut sha ka wah iaki kyndew ki shyiap ba mih na kino kino ki jingtrei, kum na kaba shna ïing shna sem, shna surok, tih maw tih shyiap bad kiwei. U ong ruh haka por slap bun kiba phone ujor sha u halor ka jingjaboh ka um, ma u pat u jubab ngi dei ki nongpynkhuid katba ki nongpynjaboh dei kiwei pat. 
Mynta u snem u iathuh ba mar ia sdang wan u slap ula bthah ban sangeh pump um shwa kumba arsngi lai sngi namar ba ka jinglong jingman ka um wym i lah shuh ban pynkhuid. Hadien kane pat ula ong iaki nongtrei ba kin pynkhuid bha iaka um daki kynja dawai shwa ban pynpoi shaki paidbah.
Haka jingiadei bad jinglang ktieh ha katei ka dam u ong ba naka liang ka ophis treikam jong ki, katba lah lyngba ka repair fund kin sa pynkhuid ynda la kham rit um haka por tlang. Kumta u sngewkmen ruh ba kane ka joint inspection ka dei ka thong naka bynta ka jingiatreilang ban pyrshang ki lad halor ban wanrah ka jingkhuid jong ka wah. 
Naka liang u Chairman ka “Khooid Yaka Wah Myntdu” u K.L.Pariat ula kyrpad jur ia u DC ban shimkhia shwa ki bnai tlang khnang ba ka um kan wym rngad bad ka jingkyrduh um ruh kan wym jia.
Kumjuh ula kyrpad iaka JHADC bad u DC ban pyntreikam  hok iaka hukum ka NGT kata ban khang iaka jingtih shyiap, jingbret khyndew harud ka Wah Myntdu, namar lada wym sangeh ka jingpyntuid khyndew, ka jingtih shyiap tih maw harud ka wah ki paidbah ka Jowai ba shaniah um na ka PHE kin sa mad jingeh.

Previous articleOh dor palat pud ki auto ïa ki khynnah skul, maham tyngeh ka FKJGP
Next articleDuna hi ka Bynrap-10 Halor ki Speaker: B.M. Lanong