Jop ka MGSF ha ka kyrdan ba-ar ka “2nd Film Festival 2020”

Ki dkhot jong ka Meghalaya Guide Scout Fellowship.

Shillong, Nailur 20: Ka Meghalaya Guide Scout Fellowship (MGSF), ka la jop ha ka kyrdan ka ba-ar ha ka jingïakob shna ïa ki film lyngkot ha ka jingïakob kaba la long hapdeng ki kynhun bapher bapher na kylleng ki jylla jong ka ri India, ïa kaba la pynlong da ka Indian Scout & Guide Fellowship ha ka 11 bad 12 tarik mynta u Nailur 2020.

        Ka Meghalaya Guide Scout Fellowship, ka dei ka kynhun kaba ki dkhot ki dei kiba la kham san ka rta bad bun ruh ki dei ki ophisar sorkar kiba la shong thait na ka kam. Ka dei ka kynhun kaba trei na ka bynta ban kyrshan ïa ki samla da kaba ïakit ïabah lem ïa ki kam jong ka Meghalaya Bharat Scouts and Guides ka kynhun kaba saiñdur ïa ka lawei jong ki khynnah bad ki samla, ba kin long kiba shemphang ha ki kam bapher bapher khamtam ba kin long ki nongïalam.

Ha kane ka snem 2020, katei ka kynhun ka la ïashim bynta ha ka jingïakob shna Film Lyngkot halor ki Guide Scout Fellowship kaba la tip kum ka “2nd Film Festival 2020” kaba long ruh ka sien ka ba-ar naduh ba la sdang pynlong ïaka, ïa kaba la pynlong da ka Indian Scout & Guide Fellowship, ha kaba na ki 23 tylli ki film lyngkot, ka Meghalaya Guide Scout Fellowship ka la jop ha ka kyrdan ba-ar.

Haba ïakren bad u General Secretary jong ka Meghalaya Guide Scout Fellowship, u Bah Lahduh Pyngrope, u la ïathuh ba ka jingjop ka Meghalaya ha ka kyrdan ba-ar ha katei ka jingïakob ka dei hi ka jingïatreilang baroh ki para dkhot, khamtam i Dr. Natalie Jo-anne Diengdoh, iba la pynbit pynbiang ïa katei ka film kaba la ai kyrteng “Support Young People”.

Previous articleKyntiew biang ïa ka FKJGP Sohryngkham sha ka Circle
Next articleDa ki phew hajar ka bai kit ñiut ka la ïing lut, poi sngewlem u MLA