Ïoh pyllait ki pulit ïa ka khynnah 13 snem, kem ïa uba kynnoh rahbor

Uba shah kynnoh rahbor ia ka khynnah

Mawkyrwat, Nailar 31: Ki pulit jong ka South West Khasi Hills District mynta ka sngi hi ki la ïoh ban pyllait noh ïa kawei ka khynnah ba dang 13 snem ka rta, kaba ki bahaïing ki la kynnoh ba ka la shah rahbor ha uwei u dkhar ñiah trok uba la tip kyrteng kum u Mohibul Ali (29).

U Superintendent of Police ka South West Khasi Hills District, u Bah Bashan J Laloo u la ïathuh ba ïa kane ka khynnah bad kumjuh ruh ïa utei u runar la lap mynta ka sngi na ka shnong Maheskola, South Garo Hills District da ka kynhun jong ki pulit ba la ïalam da u Deputy Superintendent of Police (Crime).

Ki pulit ki la kem ruh ïa utei u bar jylla hadien ba la register ïa ka kes hapoh ka kyndon 363 jong ka Indian Penal Code bad ka jingtohkit mynta ka la ïaid shakhmat, ïathuh u SP.

Ha kawei ka liang, u SP u la ïathuh ba kumba long mynta, i kumba kane ka jingjia ka lah ban ym dei satia ka kam rahbor (kidnapping case), hynrei ka lah ban dei ka jingphet tuh na ïing da ka jingïamynjurlang.

Previous articleDawa sa ki 2 shnong ban bishar hok set shi jingim ïa u nongpynïap briew
Next articleHapdeng ka jingiphuh iphieng rakhe Azadi ka Amrit Mahotsav ha Mairang