Ïaroh u Bah Process ïa ka sorkar MDA ba rai pynkynriah ïa kiba sah ha Them Metor

Bah PT Sawkmie

Shillong Risaw 12: U MLA ka seng Congress na Mawlai konstitwensi u Bah Process T Sawkmie u la ïaroh ïa ka sorkar jylla halor ka jingshim rai ban pynkynriah noh ïa ki bar jylla kiba sah be-aiñ ha Them Metor.

“Nga ai khublei kyrpang ïa u Chairman ka High Level Committee (HLC) u Bah Prestone Tynsong bad ki dkhot katei ka Committee kiba la aiti ïaka kaiphod bad ka sorkar mynta kan sa pynmih noh ïa ka jingbthah ba ki briew kiba sah be-aiñ ki dei ban mih na katei ka jaka” ong u Bah Process haba ïakren bad u Peitngor hynne ka sngi.

Une u MLA ka Congress u la ong, ki briew kiba shong ha katei ka jaka ki dei kiba trei ha Shillong Municipal Board bad ki don 128 ngut bad katkum ka kaiphod la kdew ba ki don tang 56 ngut kiba dei ban shonghok ha katei ka jaka bad ula kyntu ïa ki nongtrei jong ka SMB ba ki dei ban ai ka jingïatreilang bad ka sorkar jylla.

“Ka Harijan Panchayat Committee ka i kumba kala kam trai ïa ka jaka ka puta ha Them Metor kaba dei ka jong u Syiem Mylliem bad jong ka sorkar jylla bad ngam sngewïahab ïa kane ka jingkam trai ka jongki bad nga kyrpad ïa ka sorkar jylla ba ka dei ban shim noh ïa katei ka jaka bad ka lah ban pyndonkam ha kiba bun ki liang” ong u Bah Process.

U la ong, ka sorkar jylla kala leh ïa kaba bha tam namar kam shym la beh ïa ki, hynrei namar ba ka rukom sah ki briew ha katei ka jaka kam long kaba biang la ka long ha ka koit ka khiah ne ha kiwei pat ki liang.

“Kitei ki briew ha ka jingshisha kila dei ban kmen bad ban ai khublei ïa ka sorkar ba kala leh ïa kaba bha da kaba pynkhreh kyrpang ïaka Quarter ne jaka sah ba kin sah ryngkat bad la ki khun ki kti” ong u Nongïalam ka Congress.

U la pynpaw ïa ka jingbynñiaw ïaka jingleit pyntip jong ka Harijan Panchayat Committee sha ka sorkar pdeng bad sha ka National Commision for Minority ban pynpaw ba ka sorkar jylla ka weng donbor ïa ki, hynrei ka sorkar Meghalaya kam shym la leh donbor eiei ruh em hynrei kala shu phah pynkynriah ïa ki na katei ka jaka ban leit sah noh ha kawei pat ka jaka kaba la pynkhreh.

“Ngi kwah ba ka sorkar jylla kumba kala rai kan ïengskhem beit bad lada don mano mano ba pynthud ruh ka dei ban ïengskhem beit kumba kala rai wat lada poi haduh u pud ban kiew ha ïinglieh ïingsaw bad ngim kwah ba ka sorkar kan kynran dien noh lada don kino kino kiba pynthud” la pynkut u Bah Process.

Previous articleYn ïakren ka HSPDP bad ka GLSMC ban ai Jylla la ka jong
Next articleYn kyrshan ka HSPDP ïa ka UDP ha Mawphlang