Ïap shah bom u samla Dalit ba ïa ieit samla ha Rajasthan

Delhi, Risaw: Uwei u samla na ka jaitbynriew Dalit la kynnoh ba u la shah bom jem haduh da ïap ha ka kynhun jong ki briew ha Rajasthan’s Hanumangarh district namarba ba u ïa ieit bad don jingïadei bad kawei ka samla.

Lai sngi hadien kane ka jingjia, u district collector bad u superintendent of police ki la ïakynduh ïa ka longïing jong uba ïap ha ka sngi U Blei bad ki la ai ïa ka jingïarap bailutksan kaba 4,12,000 tyngka.

Ka video ka la saphriang ha kaba la ïohi ïa ki katto katne ki riew rangbah ba ki la bom jem ïa u samla Dalit da ki dieng. Ki la bom dusmon bad hadien ka jingïap jong u, ki la bret ïa ka metïap jong u ha khmat ka ïing jongu hi ha ka sngi Palei.

Hadien kane ka jingjia ki bahaïing ki la pynlong ïa ka jingïakhih ha khmat ka hospital ha ka thaiñ bad ki la dawa ba dei ban kem ïa kiba donkti. Naduh kane ki pulit ki la kem ïa ki san ngut.

U Indra Kumar, CI jong ka Pilibanga police station ha Hanumangarh, u la ong ba kito kiba la ïohi ha ka video ba shoh ïa u samla Dalit kin sa shah kem khala khala. “La pyntikna ïa ka longïing ba kin ïoh ïa ka jingbishar hok bad mano mano kiba donkti yn nym pyllait ïa ki,” u la ong.

Ha kajuh ka por, kane ka jingjia ka la pynlong ïa ki seng saiñ hima ruh ba kin mih shakhmat ban pynrem ïa kane ka jingpynïap. Ka Bahujan Samaj Party (BSP) President Mayawati ka la ther ïa ka sorkar Congress ha Rajasthan bad ka la ong ba kane ka jingjia ha Hanumangarh ka long kaba sngewsih kthang bad ka dei ia ka ba kan pynrem.

Ka myntri rangbah barim ka Uttar Pradesh ka Mayawati ka la ong ha ka sngi U Blei lyngba ka twitter, “Ka jingthombor ïa u samla Dalit ha Hanumangarh ka long kaba sngewsih bha bad nga pynrem ïa ka, hynrei balei ba ka Congress high command ka sngapjar? Hato u myntri rangbah ka Chhattisgarh bad Punjab kin leit shato ban ai mar 50 lakh tyngka sha ka longïing uba ïap? Ka BSP ka kwah ïa ka jubab lym kumta sangeh ka jaw ummat iakjakor ha ka kyrteng jong ki Dalit.”

Ka BJP ruh ka la hiar thma lem ïa u myntri rangbah ka Rajasthan u Ashok Gehlot. U president ka party’s Hanumangarh district u Balveer Bishnoi u ong, “Ka  sorkar Congress  kaba kren shaphang ka jingai jingïada ïa ki Dalit, kam shym la lah ban pynurlong pura ïa ka. Kum kine ki jingjia ki ïai jia jan man ka sngi. Ki aiñ ki kanun ki la khyllem lut.

“U MR ka Rajasthan u Ashok] Gehlot u shong ha ïing da kaba ai daw Covid-19 bad ki paidbah pat ki la shah ktah ,” u la bynrap.Haba pynphai ktien u myntri sorkar ka Rajasthan u Pratap Singh Khachariyawas u la ong sha ki lad pathai khubor, “Ka jinglong jingman ha Rajasthan kam shym la long kum ka Uttar Pradesh. Hangtei ngim shym la ïada ïa ki riew runar. Baroh kiba donkti ha ka jingjia ha  Hanumangarh kin shah kem lut. Yn nym lait iwei ruh.”

Previous articleShi sdie thlieh u riew rangbah ïa ka samla haduh banda ïap
Next articleI-League Qualifier: Lait jah burom ka Ryntih hadien ba jop ïa ka Bengaluru FC