Ïakynduh u Conrad ïa u Dr Jitendra Singh ha New Delhi

Ïakynduh u Conrad ïa u Dr Jitendra Singh ha New Delhi

New Delhi, Rymphang 09: U Myntri Rangbah jong ka jylla Meghalaya, u Conrad Sangma mynta ka sngi u la ïakynduh ïa u Myntri khynnah jong ka Sorkar Pdeng ba dei peit ïa ka Tnat  Development of North Eastern Region (DoNER), MoS PMO, Personnel, Public Grievances, Pensions, Atomic Energy and Space, u Dr Jitendra Singh ha New Delhi bad u la ai khublei ïa u na ka bynta ki jingkyrshan ba man ka por ba ka Tnat DoNER ka la ai sha ki projek jong ka jylla.

U la kdew kyrpang ruh ïa ka projek surok ba dang shen ba la mang hapoh ka skhim North East Special Development na ka bynta ban kyntiew ïa ka surok Mawshynrut-Hahim-Boko.

U Dr. Jitendra Singh u la ong ha u Conrad Sangma ba u Myntri Rangbah duh ka ri, u Narendra Modi u shimkhia hi dalade ban buddien ïa baroh ki jingeh ba ïadei bad ki jylla ka thaiñ shatei lammihngi.

U la ong ba hapoh ki jingbthah jong u Myntri Rangbah duh ka ri, la phaikhmat kyrpang ban kyntiew ïa ka jingbiang ki lad ka leit ka wan lyngba ki kad lieng suiñ ba thymmai, ka jingpynher ïa ki liengsuiñ bapher bapher, ka jingkyntiew ïa ki lynti rel ha ka thaiñ, ki surok bad ki lynti ïaid lieng ba thymmai.

Katba na ka bynta ka jylla Meghalaya, u Dr.Jitendra Singh u la kren shaphang ka jingwanrah dang shen ïa ka liengsuiñ direk na Shillong sha Delhi. U la ong, kane ka long ka jingdonkam kaba la sahteng la slem bha bad namar ba ka nongbah Shillong ka long ka jaka jngoh kai ba pawnam kumjuh ruh ka nongbah tynrai jong ka jylla Assam ba mynshuwa, ka donhok ban ïoh ïa kane ka jingdonkam.

Kumjuh ruh, u Dr. Jitendra Singh u la pynkynmaw haba ka Sorkar u Modi ka wan ha u snem 2014, bun ki briew ha Meghalaya kim pat ïohi ïa ka rel ha ka jingim jong ki. Mynta ka projek ban siang lynti rel ar laiñ ka la sdang ha ka thaiñ, u la ong.

U Myntri Rangbah jong ka Meghalaya u la pyntip ïa u Myntri ka tnat DoNER ba ki jaka jngoh kai ha ka jylla ki la sdang ban bun biang ki nongwan kai na kylleng sawdong. Halor kane, u Dr. Jitrendra Singh u la jubab da kaba ong ba u sngew skhem ba mynta u snem un long u snem ba kiew bha ki kam jngoh kai pyrthei ha ka thaiñ namar bun ki briew kiba ju smat ban leit kai sha Europe ki la shah khang lad namar ka khlam Covid hynrei ki jaka jngoh kai ha ka thaiñ ki la kham lait na ka jingktah jong kane ka khlam.

U Myntri Rangbah u la ïaroh ïa ka rukom ba ka Tnat DoNER ka la ïarap ban pynbeit ïa ki jingeh ba kongsan jong ki jylla ka thaiñ shatei lammihngi. La ïakren ruh halor ka jingeh ba ïa dei bad ka jingmang pisa ha ki projek ba thymmai lyngba ka jingïarap na ka Sorkar pdeng.

U Sangma u la pynsngew ruh hakhmat u Myntri ïa ki katto katne ki jingtyrwa ba thymmai ban ïoh jingkyrshan na ka Tnat DoNER bad ka North Eastern Council. U Myntri Sorkar Pdeng u la pynthikna ïa u Myntri Rangbah ba un peit bniah ïa kine ki jingtyrwa.

Previous articleOt tulop ïa ki MLA ban pyndap ïa ka pla tyngka ka sorkar: KHNAM
Next articleHapoh 18 tarik ai por ki nonghikai MSSASA ban pyntreikam ïa ki jingdawa