Ïakynduh ka HYC, SWKH ïa ka DC halor ka jingthungkam

Ki nongialam ka HYC, SWKHD kiba iakynduh ia ka DC

Mawkyrwat, Naitung 20: Ka HYC South West Khasi Hills ka la leit ban iakynduh ia ka Deputy Commissioner jong ka SWKHD hynne ka sngi bad ka la ai jingmut halor ban pynthikna ba kano kano ka jingthungkam kan long kaba khuid kaba suba.

Katkum ka kyrwoh ba ki la phah ki la pynpaw ba dei ban pynthikna ba kan nym don kano kano ka jingai lypa ia ki jingkylli.

“Halor kane ngi ai jingmut ba kano kano ka tnad ba pyniaid ia ki jingthungkam (DSC lane ki Recruitment Departmental Board) ka dei ban phah pynkhreh ym duna 20 set ki jingkylli (Question Papers) bad ynda ki nongwadkam kam ki la rung ha ka Examination Hall sa jied ia ka jingkylli ban sam da kaba shu khalai nusib bad ia kata dei ban da ring video,” ong ka kyrwoh ba la phah da ka HYC, SWKHD.

Ka la pynpaw ruh ba ia kiwei pat ki jingkylli bym shym la sam hadien ba kut ka Written Examination dei ban upload ha ki Website bad dei ruh ban tah ha ki Public Notice Board khnang ba baroh kin tip ba ka don ka jingiapher kawei ka Question Paper na kawei pat.

Ki pynpaw ruh ba ka Interview Mark kam dei ban tam ia ka 12% kumba la kdew da ka Supreme Court ka Ri India ha bun tylli ki rai jong ka. Dei ban buh CCTV bad dei ban ring video ia baroh ki Examination Centre, ia ki interview bad kumjuh ruh ha ka por ba niew ia ki mark. Dei ban pynbna ia ki result hapoh ka 24 kynta mar ia dep ka interview. Ki briew ba pyniaid ia ka interview ym dei ban shah ba kin phone briew ne rah mobile phone ha ka por ba shim interview haduh ban da pynbna ia ka result.

Ka HYC, SWKHD ka pynpaw ruh ba ka jingthung ia ki nongshim interview, ki nongset jingkylli bad ki nong bishar ia ki jubab kim dei ban dei ki briew kiba ia don bynta ha ka politic ne ki dkhot jong kano kano ka Political Party ne kiba ha ing jong ki MLA, MP ne MDC. Ngi ai jingmut ba ki nongshim interview kin dei ki briew kiba la pass ia ka Master Degree bad kiba don ka nam babha ha ka imlang sahlang. Lada jia ba ki nongshim interview ki don ka jingiadei ba ha ing , ia dei kur , ia dei para shnong ne kivia jan bha ka long ing long sem bad ki nongthepkam ym dei ban shah ia ki ba kin shim ia kata ka interview bad kabha ban don kham bun ki nongshim interview.

Baroh ki briew kiba ia don bynta ha ka jingpyniaid ia ka recruitment naduh ki nongset jingkylli, ki nongbishar ia ki jingkylli bad ki nongshim interview ki dei ban wan pyntip bad iathuh ia ka jingdon jingem jong ki bad kiba ha ing jong ki ( filing and declaration of asset by Affidavit) ha shwa ba kin shim ia ka kam bad hadien kata kumba 5 snem kynthih hadien ba la dep ia ka jingthungkam. Dei ban buh ia kine ki jingpyntip ha ki jingpyntip paidbah (Public Domain).

Ha ki jubab ( Answer Script) jong ki Written Examination ym dei ban shah ba kin thoh ia ka  kyrteng  jong ki nongthep kam, tang ka number dei ban thoh. Haba bishar (correction) ia ki jubab dei ban da tap noh lypa ia ki number jong ki candidate bad dei ban don ka CCTV lane video recording ha ka por ba bishar ia ki jubab. Ngi dawa ruh ba ka bha ban don kumba lai kynhun ne lai sien bishar ia ki Answer Script khamtam eh ia ki jingkylli ba jrong (Descriptive Answer).

Ia ki jingkylli barit (Objective) la dei ban shu pyndonkam da kito ki jingkylli ba haba bishar ia ki dei ban shu scan da ki computer. Ym dei ban Experience Certificate haba thungkam namar bun ki samla pule hadien bun bun snem ba ki la pass ia ki jingpule kim iohkam iohjam te kin ioh Experience Certificate naei.

Ia kino kino ki briew kiba pynkhein ia ki kyndon ba la buh bad ia kito ki samla wadkam kiba leit pan jingiarap na ki politician ne ki nongshim interview ne ki nongpyniaid ia ka jingthepkam dei ban pynngat kyndon aiñ kum ki kyndon jong ka Prevention of Curruption Act bad dei ruh ban Black List syndon ia ki haba ki thep ia kino kino ki iam sorkar ha ka Ri India hi baroh kawei. Ia ki politician ne ki ophisar sorkar  ne kino kino ki briew kiba wan mushlia ia ka jingthungkam dei ban pynngat kyndon ia ki ruh . Ia ki briew ba ia don bynta ban pyniaid ia ka recruitment lada lap ba ki pynkhein ia ki kyndon dei ban weng noh na kata ka kam ba ki bat, ia ki ophisar dei ban wengkam syndon ia ki bad kumjuh ruh dei ban pyngat kyndon ia ki.

Kane ka long katkum ka kyrwoh ba la phah da u samla Arbok Kharjahrin, President , HYC ka South West Khasi Hill District.

Previous articleLai sngi yn khang ki sengbhalang ïa ki nongtrei ka ophis DMHO
Next articleÏap 13 bad ïabit COVID-19 thymmai 500 ngut