Wednesday, December 8, 2021

Ïakhaid ka Pomlakrai bad Mawnianglah ha ka sngi sdang ka U-20 4th Division

Shillong, Risaw 03: Hadien shisnem shiteng ba ka phutbol ka la sangeh namar ka jingwan lynshop ka khlam Covid-19, hynrei ha ka sngi Saitjaiñ ki paidbah ki la ïohi biang da la ki khmat ïa ka jingwanphai biang ka phutbol ha sor Shillong ïa kaba la pynïaid da ka Shillong Sports Association (SSA). Ka SSA ka la sdang hynne ka sngi da ka lympung ïalehkai U-20 Fourth Division hapdeng ka Pomlakrai bad Mawnianglah na ka Group A ha Second Ground, Polo.
Ka jingïalehkai ka la long kaba shongshit bha hapdeng kine ki arliang mamla watla ka jingïakhun la buh por tang 70 minit.
Ha ka kylla step ka Mawnianglah ka la ïoh pynkhih jar lyngba u Havertson Thawmuit ha ka minit kaba 15 kaba la aibor ai mynsiem ïa kane ka kynhun ïalehkai.
Hynrei ha ka kylla miet ka Pomlakrai kam shym la duh mynsiem bad pyneh triang bad khatduh ka la ïohsiew kylliang lyngba u Phyrnaiboklang Sohtun ha ka minit 50.
Ha kane ka Division ki don 15 tylli ki team kiba mih madan bad kiba la phiah ha ki saw group. Ka Group A, B bad D ki don saw team katba na ka Group C ki don lai team.