Hap ïakhun u Bah Esron kum u kyrtong shimet

Bah Esron Marweiñ

Shillong Risaw 12:Ka Election Commission of India ka la bthah ïa ka tnad Election jong ka jylla ban ym ithuh ïa u kyrtong ka Khun Hynniewtrep National Awakening Movement (KHNAM) u ba ai reng ïa ka ilekshon shiteng samoi namar ba kane ka seng kam pat lah ban pynbeit ïa ka kam nongïalam hapoh ka seng bad u kyrtong uba la pynïeng da ka KHNAM na Mawryngkneng u Bah Esron Marweiñ un hap ïakhun noh kum u kyrtong khlem seng ne Independent.

U President ka KHNAM Youth Wing u Bah Thomas Passah u la ong, “Hadien ba u MLA ka seng u Bah Adelbert Nongrum ula dep tyrwa ban pynïeng ïa u kyrtong na Mawryngkneng, hynrei ka tnad Election jong ka jylla bad u Returning Officer (RO) ki la ïoh pdiang ïa ka shithi na ka Election Commission of India (ECI) ban ym pdiang ïa ka Form jong u Bah Pyndap Saibon ne Bah Adelbert Nongrum namar ba ka seng ka dang don hapdeng ka kynrum kynram bad jinghuri hura bad dei ban pynbeit shwa”.

U Bah Thomas u la ong, u RO hadien ka jingïatai sani u la shim ïa ka rai ba u kyrtong uba la tyrwa da u Bah Adelbert ban ïakhun na ka KHNAM mynta un hap ïakhun noh kum u kyrtong shimet.  

Na ka liang u Bah Adelbert u la pynpaw ïaka jinglyngngoh halor kane ka jingjia khamtam haba ka wan jia beit tang ha ka por ilekshon bad u la ong, ba u Bah Esron Marweiñ u la thep kyrteng ha ka 8 tarik ban ïakhun ïa ka ilekshon shiteng samoi hynrei ha ka sngi ban bishar bniah ïa ki kot ki sla, kata ha ka 11 tarik mynta u bnai, ka ECI kala phah ïa ka shithi bad bthah ïa u RO ban ym ïathuh ïa kino kino kiba soi ha ka form ban ïakhun na ka KHNAM.

U la kyntu ïa ki paidbah ba watla u Bah Esron ym ïoh ban ïakhun na ka KHNAM hynrei un hap ban ïakhun noh kum u kyrtong shimet hynrei kin bteng ban ai ka jingkyrshan ïa u.

Previous articleMynjur ka komiti ban ai tika Covaxin ïa kiba naduh 2 haduh 18 snem
Next articleShah kem u lehnoh ka Pakistan na Delhi, kurup AK 47 bad ki kuli