Halor ka kam bat bor ngat kyndon POCSO u kpa, ka kmie bad u kñi

Nongstoiñ, Risaw 12: U runar ba na ka shnong Porla Maweit uba la donkti ban batbor ïa la ki jong ki khunrit ba dang hapoh ka 14 snem ka rta u la shah pyngngat ha ki kyndon aiñ ba tyngeh, kata ha ka kyndon 5 (I) (n) bad section 6 jong ka POCSO Act kaba la kdew shai ba u nongleh ïa kiba kum kitei ki kam u lah ban ngat ha ka jingshah set along kaba 20 snem lane haduh shirta jingim ne wat ban rai da kaba shu pynïap.

Ïa kane la ïathuh da u District Child Protection Officer ka West Khasi Hills District u Bah W. Shabong ha ka jingïakren bad u nonglum khubor mynta ka sngi ha ophis treikam jongu.

U Bah Shabong u la ïathuh ruh ba ka kmie bad u kñi jong kitei ki arngut ki heprit kiba la donkti ban buhrieh ïa katei ka kam ruh ki la shah pyngngat ha ka kyndon 21 ((I) jong ka POCSO act ha kaba ki lah ban shah set along haduh hynriew bnai kynthih lane ryngkat bad ka kuna.

U DCPO u la batai ruh halor ki lad ki lynti kiba ka ophis ka la shim na ka bynta ban ai jingïarap ïa kitei ki heprit bad kumjuh ruh u la ban jur halor ka jingdonkam ïa ka jingïatreilang jong ki shnong ki thaw ban ïakhun pyrshah ïa kiba kum kine ki jingjia kiba la pynshong syier ïa ki kynthei khynnah bad pynsuhjer ruh ïa ka imlang ka sahlang.

Previous articlePlie u bah AL Hek ïa ka Shillong Ayurvedic Wellness Centre ha Nongmynsong
Next articleDuhnong ki khynnah skul ba ïakhih ki nonghikai SSA