Monday, June 21, 2021

Ha ka rta ba 60 khlad noh u Diego Maradona

Buenos Aires, Naiwieng 25: U Khlur ïalehkai phutbol ha ka pyrthei u Diego Maradona u la khlad noh na kane ka sla pyrthei ha ka rta ba 60 snem hadien ba u la ïoh ïa ka jingpang kyndeh shadem ha ka sngi Balang.

U Maradona u dang shu dep shah puid ha une u bnai ba la leit ban weng ïa ka snam sniew na ka jabieng jong u. u dang shu lait na hospital ha Buenos Aires ar taïew mynshuwa.

Ïa u Maradona la ju ithuh paidbah da baroh kum uwei na ki nongïalehkai phutbol ba khraw ha ka pyrthei.

Ha ka jingim na ka bynta ka lawei jong u, haba u dang 21 snem u la lah ban ïalam ïa laka jong ka ri ka Argentina ba kan ïohrah syndon ïaka World Cup ha u snem 1986.

U Maradona u la sdang ïa la ka jong ka lawei haba ïalehkai phutbol naka Argentinos Juniors shwa ba un leit ban pynïasoh bad ka Boca Junior, kaba hadien ka Barcelona ka la jied noh ïa u khlem da pynslem.

U la pynlut tang ar aïom ha Nou Camp shwa ba un leit ban pynïasoh bad ka Napoli kaba u ieit.

Ka dei ha Italy ha kaba baroh ki la sdang ban ithuh ïa u Maradona kum uwei na ki nongïalehkai phutbol uba paw baroh shilynter ka jingim jong u.

Ki nongkyrshan ka England kim ju lah ban klet ïa u Maradona uba la pynliem ïa ka England ha ka 1986 World Cup naka bynta ka kol ba u la thep da ka kti kaba ki khot da ka ktien nongwei ka ‘Hand of God’, kaba la pynkut syndon ïa ka England ha kane ka lympung ïalehkai.

Sa kawei ka kol basah kynmaw kaba dei artad ka kol kaba ar kaba la thep da u Maradona ka dei hadien ba u la ïoh ban pyllait ïa ki san ngut ki rangïalehkai ka England bad u rangap kol u Peter Shilton u khlem lah ban leh eiei ha kaba u la ïoh ban thep ïa ka kol thylli.