Duna hi ka Bynrap-10 Halor ki Speaker: B.M. Lanong

Ka jingthmu weng sha ki Lamphang (Speaker) Ïing Dorbar Thaw Aiñ, ka dei ban long tang ha ki khep bakyrpang, lada ki Lamphang ki leh shiliang khmat lane ki shah liang kum ki Nongpyniaid dorbar.
Ka daw ba ki Speaker ki dang long hi ki dkhot ki Seng jong ki, ka dei namar ka Bynrap-10 (Tenth Schedule) hi jong ka Constitution ka don jingbakla, ba ka ieh ha ka mon ki Speaker ba kin iehnoh ïa ka jinglong dkhot na ki Seng, shuwa ban jied ïa ki kum ki Speaker, katkum ka parakrap 5 (a).
Kam dei ban long ha ka mon kynjai jong ki, ba kin iehnoh ïa la ki Seng shuwa ban jied ïa ki kum kita ki Speaker. U Bah Metbah ruh u dang don hapoh ka Seng UDP kum u Speaker, namar ba duna katei ka aiñ. Shawei ruh ki Speaker ki leh kumjuh.
Ka aiñ ka dei ban shai kdar, ba ki dei ban iehnoh kum ki dkhot ka Seng hapoh 24 kynta hadien ba la dep jied, ym shuwa ban jied.
Ka paragraph 5(b) ka ïada ïa ki ba ynda ki la kut ka samoi long Speaker, kin kylla long biang ki dkhot ka Seng. Kumta ka donkam ban pynbeit kloi ïa katei ka jingduna ha ka Bynrap-10(a) da ka Sorkar India.
Ka Jingleh ki Speaker Barim
Ha u snem 1991, u Speaker P.R.Kyndiah, hapoh ka paragraph 7 jong katei ka Bynrap-10, kaba ong kumne – “ym don kano-kano ka Ïingbishar kaban donbor ban tuklar ïa ka jingshah weng ki dkhot (MLA) hapoh ki kyndon jong kane ka Aiñ,” kumta ula pynduh ïa ka jinglong nongmih khmat ki 5 ngut ki MLA Independent-khlem Seng, ba ki don kti ban kyrshan liang.
Sa kawei lei-lei, kaba u Speaker E.D.Marak ha u snem 2001, u shu thom ha la ka mon, khlem ailad ïa u Bah E.K.Mawlong Chief Minister tang ba un jubab pynshai ruh, halor ka jingkynnoh pap ka kynhun Congress, ba ula leh palat pud ha kaba aiwai ban tei ïa ka Meghalaya House, Calcutta ha ka Asian Housing Limited Co.
Ka dei ka rukom kaba don hapoh ki aiñ treikam ruh, ba uno-uno uba shah kynnoh u don ka hok ban ïada lane ban pynshai. Kane lei ka jingthmu pynhiar shuki ïa u Bah Metbah Lyngdoh kum u Speaker ka Ing Dorbar, kaba la pynlyngngoh ïa ki babun, namar ki Congress, tang ïa ka daw kaba shai ruh kim shym kdew.
Te hynrei imat ki smiej ñoh kyrtoh lyndet bad phalang kylla sha lade halor kitei ki artylli ki jingjia, kumta ki kynran dien noh.

Previous articleJurip ki enjiniar, bor District bad Rangbah Shnong
Next articleShabar ka jylla, pynkilan met ka MCA ïa la ki nongïalehkai kriket