Duhnong ki khynnah skul ba ïakhih ki nonghikai SSA

Nongpoh, Risaw 12: Da ka jingsngewkhia kaba jur halor ka jingleh meinah jong ka sorkar jylla ïa ki nonghikai Surva Shiksha Abhiyan (SSA) ha kaba kine ki nonghikai kim shem la ïoh ïa la ka tulop da bun bun bnai, mynta ka sngi ki nonghikai SSA, Ri Bhoi district ki la pynlong da ka jingïakhih kaba 2 sngi da kaba sangeh ban leit ai jinghikai sha ki skul bapher bapher.

Kane ka jingïakhih jong ki nonghikai SSA ha Ri Bhoi district ka long ruh shimbynta ban ai jingkyrshan ïa ka jingïakhih jong ki nonghikai SSA kiba dang ïakhih ha baroh kawei ka jylla.

Haba ïa kren bad ki nongpynïaid skul jong ka Umterlen Secondary School bad ka Dresi Memorial Secondary School, kiba kynthup ïa ka kong Theodora Kharkongngor bad u Bah Baseisoh Syiem, ki la pynpaw ba kane ka jingïakhih jong ki nonghikai SSA ka la wanrah ïa ka jingduhnong kaba khraw ïa ki khynnah skul khamtam na jingpep jong ki nonghikai ban wan sha ki skul ban ai ïa ki jinghikai bapher bapher.

Ki la ong ruh, ba ki khynnah skul ki la mad lypa ïa ka jingduhnong kaba khraw ha ka liang ka pule puthi khamtam namar ka jinglynshop jong ka khlam COVID-19, ha kaba ki ïing skul ki la hap ban khang dam mynta la bun bnai hynrei tang mar ïa ïohlad ban plie skul biang la wan mih pat sa kane kawei ka jingeh namar ka jingïakhih jong ki nonghikai.

Na ka liang kine ki bor pynïaid skul, ki la buh ïa ka jingkyrpad kaba jur sha ki bor sorkar jylla khamtam ka tnat pule putbi ba kan sngap ne pynurlong noh mardor ïa ki jingdawa jong ki nonghikai SSA ha kaba ïa dei bad ka tulop kaba ki khlem ïoh mynta la bun bun bnai, khnang ba ki nonghikai kin ïoh biang ban wan ai jinghikai bad ban ai jingmyntoi ïa ki khynnah skul.

Previous articleHalor ka kam bat bor ngat kyndon POCSO u kpa, ka kmie bad u kñi
Next articleKiew ki kam shah thombor ki kynthei ha WKH