Dei tang u kuli ban pynkhiah jingpang ‘Benami & Dalai’: ong ka HNLC

Donkti ki politishan bad nongialam sengbhalang
*Ka Benami Act khlem kniat*

Shillong, Lber 30: Ka HNLC ka pynpaw ba ki la lap ba jur bha ka jingleh benami ha ki kam khaii, la ka dei ha ki kam khaii paidbah bad kumjuh ha ki kam shimet, kynthup ruh ia ki ophisar bamsap jong ka sorkar, kiba na rilum Khasi Jaintia bad na Ri Bhoi.

Katkum ka kyrwoh ba la phah da u bah Saiñkupar Nongtraw, General secretary cum Publicity secretary ka HNLC ula iathuh ba ki nongkhaii kiba nabar jylla ki pyndonkam ia ki nongkhaii ka thain, ki kontraktor bad kumjuh ruh ia ki politishian ban lum spah na ka jylla lyngba ka jingleh benami.

Da kane ka jingleh benami jong ki ha ka kam khaii bad ha ka jingthep bad jingsei pisa, ki bar jylla ki lait naka jingsiew khajna, ong ka kyrwoh na ka HNLC.

Ka iathuh ruh ba bun na ki karkhana ha ka jylla ki iaid iew bha haba leh benami, kynnoh ka HNLC.

“Ki karkhana dewbilat, ki karkhana shna coke bad kiwei ki karkhana ki dap da ka jingleh benami suda. Wat i kam khaii barit ruh la pyndonkam da ki nongkhaii barjylla. Hadien ba ngi la iohpdiang katto katne ki sakhi sabut na ki paidbah ka rilum Khasi Jaintia bad Ri bhoi, ka HNLC ka la ioh lum shibun ki jingtip halor ka jingdon ki nongkhaii kiba leh benami,” kam ka HNLC.

Ka HNLC ka iathuh ba ki don ruh katto katne ki politishian kiba donkti haba khaii kam benami. Kine ki politishian ki la don la ka jong ka bhah ha ki karkhana bad ha ki kompeni dewbilat. Ha ka juh ka por ki don ruh ki riew shimet kiba ak ialade kum ki Dalal ban pynioh NOC bad kumjuh ban ioh ia ka jingbit na ka single window clearances naka sorkar jylla.

Ka iathuh ruh ba wat ki tnat sorkar ruh ki treikam ha kane ka juh ka rukom. Ki nongkhaii nabar ka jylla ki shim bynta haba thep tender da kaba pyndonkam da ki kontraktor ka thain.

Ka la kynnoh, jan baroh ki tnat ha ka jylla ki la shah ktah ha ka khaii benami. Ki kam kontrak, ki kam saplai la shu ia leh mynleh da ki nongkhaii barjylla. Ki kontraktor ka thain ki ju iarap pura halor kane ka kam benami.

“Ngi la ioh jingtip ruh ba ki don katto katne ki nongialam sengbhalang ha rilum Jaintia, Khasi bad khatam ka Ri Bhoi, ki donkti bha hakane. Ki nongkhaii nabar ka jylla ha ka jingshisha ki pyndonkam ia ki katto katne ki nongialam sengbhalang ban pynrung ia ka jingpang khaii benami bad ban byrngnem ia kiwei ki nongkhaii. Ka long kaei kaei kaba sngewsih kthang ba ki nongiada ia ka jaitbynriew ma ki dalade ki donkti ha kum kine ki kam. Napdeng ki 34 tylli ki karkhana shna coke ha rilum Jaintia, 14 na ki ki la ioh jingbit tang hapoh ka san bnai,” ong ka HNLC.

Ka iathuh ba ki nongtrei jong ki tnat bapher ha ka jylla ki donkti haba ai jingbit sha ki karkhana shna Coke, ki karkhana ruh ki don ka jingkitkhlieh na kabynta ban leh benami.

Bun na ki department sorkar ki la kyllalong ki mashin shna pisa jong kita ki heh kiba kam ialade ki ophisar. Iakine ki ophisar ruh la thung da ki politishian ban pynmyntoi tang ia lade ha ka polisi shim bad ai.

Watla ka jylla ka la pass ia ka Meghalaya (Benami Transactions Prohibition) (Amendment) Bill, 2018, ha kaba ka la buh jingtyrwa ban pynkylla ia ki katto katne ki kyndon jong ka Meghalaya (Benami Transactions Prohibition) Act, 1980 (Meghalaya Act No 24 of 1980) da kaba pynrung ia ka section 2 (e) and Section 2 (f), hynrei ki dang jyllei ki kam benami.

Ka la buh jingtyrwa ruh ban pynkylla ia ka Sub-section (1) jong ka Section 4 jong ka Meghalaya (Benami Transactions Prohibition) (Amendment) Act, 2016 of Act No. 4 of 2016 kaba pynlah ia ka sorkar jylla ba kan thaw ia ka committee ne ki bor ba dei khmih haman ki district naka bynta ban pdiang bad ban tip ia ki jingpynshisha lyngba ki jingujor ne ki jingtip shaphang ka jingrung bad ka jingmih ka pisa ha kakam benami ha ka jylla.

Ia ka Meghalaya (Benami Transactions Prohibition) (Amendment) Act, 2016 la pass da ka sorkar jylla kum shi bynta ban khanglad ne iada ia ka jingrung kyrthep ki mynder hapoh ka jylla. Hynrei tad haduh mynta kane ka act ka la trei kum u khla u bym don bniat.

Kumta haba ia dei bad kine ki kam benami ka HNLC ka maham jur ia baroh ki nongkhaii, ki nongtrei sorkar bad ki dalal ba kin sangeh mardor ia kane ka kam benami.

“Ha kane ka kynti un dei u kuli u ban kren. Ka HNLC ka la rai ruh ban ithuh bad ban ai ia ka jingpynsaja da kaba pyniap ia ki shimet kiba leh kum ia kine ki jaitkam. Ngi la rai ban pynkhiah ia kane ka jingpang bad ka lad kaba sah ka dei sa tang u kuli naka bynta jong ki shimet bad da u bom IED naka bynta ki karkhana,” byrngem ka HNLC

Ka HNLC ka ban jur ruh ba kim dei ban niew sting ia kane ka jingmaham jong ka.

Previous articleWat ong ki Balang kim don bynta ha ka politik, ong u MDC Mawhati
Next articleLah ban duh bording biang naduh ka 14 tarik