Dawa u MLA & MDC ban pynurlong ïa ka Umden C&RD Block bad surok NUS

Nongpoh, Naitung 19: Na ka bynta ki jingdonkam kiba hakhmat eh jong ki paidbah khamtam ka Nongpoh Konstituensi, mynta ka sngi, ki ar ngut ki nongmihkhmat kane ka thaiñ u Bah Mayral Born Syiem, MLA bad u Bah Balajied Rani kum u MDC, ki la leit ban ïa kynduh markhmat bad u Myntri Rangbah ka jylla u Conrad K Sangma bad ruh ban aiti ïa ka dorkhas halor ki mat jingdawa kiba ka sorkar jylla kan pynurlong ïa ki.

Ha kane ka jingïakynduh ïa u Myntri Rangbah, kine ki arngut ki nongmihkhmat ki la pynpaw ïa ka jingdonkam ban pynïoh noh da kawei ka C&RD Block hapoh Umden Nongtluh bad ruh ban pynmang noh da u surok ba paka ban pynïasoh ïa ka Nongpoh, sha Umden bad sha Sonapur ïa u ba la ju tip kum u NUS road.

Haba kren bad ki Nongthoh Khubor hadien ka jingïakynduh bad u MR, u Bah Mayral Born Syiem, u la ïathuh, ba ka jingïakynduh ïa u Myntri Rangbah mynta ka sngi, ka long ban pynsngew ha u ïa ka jingdonkam kaba kyrkieh ban ithuh noh ïa kawei ka C&RD Block na ka bynta ka thaiñ Umden Nongtluh, namar ba kane ka thaiñ ka dang shah pynhap hapoh ka Umling C&RD Block mynta la bun bun snem.

U la ïathuh ruh, ba ka Umling C&RD Block ka dei kaba la heh bha bad kam lah shuh ban kdup ïa kiba bun tylli ki shnong haduh 226 tylli ki shnong bad palat 11500 ki longïing bad ka jingbun paid ka la kot sha ka 81,000 ngut bad ka long ka jingeh kaba khraw ïa kane ka C&RD Block ban peit lut ïa ki jingdonkam jong baroh ki shnong ki thaw khamtam sha ka thaiñ Umden Nongtluh kaba hap ha Nongpoh Konstituensi.

U Bah Syiem, u la ïathuh ruh, ba ha kane ka jingïakynduh ïa u Myntri Rangbah kum u nongmihkhmat ka thaiñ u la leit rah ruh ïa ka mat halor ka jingeh jong ki paidbah namar ka jingsniew kaba la palat liam jong u surok ba pynïasoh na Nongpoh sha Umden bad sha Sonapur, kumta u la kyrpad ruh ïa ka sorkar jylla ba kan phaikhmat noh mardor halor kane ka jingdonkam jong ki paidbah kane ka thaiñ.

Previous articleWat ïa i barit ruh kam lah, shaei kan lah ka sorkar ban pynbeit ïa u pud:Angela
Next articleKyntait eksamin u doktor ïa ka khynnah kaba shah leh beijot