Dawa u James & NPP ban ai Distrik noh ïa ka Dadenggre

Shillong, Naitung 19: Ki dkhot jong ka Seng National People’s Party (NPP), Dadenggre, lem bad ka jingdon ryngkat ka jong u nongmihkhmat jong kane ka konstitwensi, u James K. Sangma ki la wanrah shakhmat ia ka dorkhas (memorandum) ha ka Lah Sngi u Blei, kum ka dak ban pynsngew bad kyrpad ia u Myntri Rangbah, u Conrad K. Sangma ban kyntiew kyrdan noh ia ka Dadenggre Civil Sub-Division sha ka kyrdan Distrik.

Ka Dadenggre Civil Sub-Division ka long kawei na ki sub division kaba la rim bad hyndai bha bad la seng nyngkong ia ka ha u snem 1982. La bun snem la wanrah shakhmat ia kane ka jingkyrpad bad jingdawa ban kyntiew kyrdan noh sha ka kyrdan distrik bad ka Seng NPP ryngkat lem bad ka jingkyrshan jong ki nongshong shnong ka Dadenggre ki la ialeh ban trei shitom met bad mynsiem khnang wan pynurlong ia kane ka jingkyntiew kyrdan.

U Sorojit Momin, u Youth General Secretary jong ka NPP, Dadenggre Block u la ong, “Mynta ka sngi, ngi na ka liang ka NPP unit jong ka Dadenggre, ngi la ia kynduh ia u Myntri Rangbah, u Conrad Sangma bad ngi la aiti noh ia ka memorandum na ka bynta ka jingpynlong Distrik bathymmai ia ka Dadenggre.”

Nangta u la bynrap shuh shuh, “Ngi sngewkmen shikatdei ei ba ngi la ioh pdiang ia ka jingkubur bad ka jubab kaba sngewtynnad na u Myntri Rangbah.”

Ka jingkubur ka jong u Myntri Rangbah badon burom ka long kum ka jingai mynsiem ia ki paidbah nongshong shnong jong ka Dadenggre kiba trei shitom khlem da shongthait na ka bynta ka jingsan bad ka jingroi jingpar ha baroh ki liang jong ka civil sub-division.

“Ngi sngew ban ai khublei shi hajar nguh ia u Myntri Rangbah jong ngi, u Conrad K. Sangma uba la pyllait por khnang ban shah shkor ia kine ki jingpynsngew bad jingdawa jong kane ka kynhun bad kumjuh ruh ban ai ia ka jingkubur na ka liang jong u” la ong u James K. Sangma, u nongmihkhmat jong ka konstituensi Dadenggre.

Previous articleKyntait eksamin u doktor ïa ka khynnah kaba shah leh beijot
Next articleKan ym don jingmut ka jingwan u Amit Shah lada um treh ïakren ILP: Bajop