Dawa sa ki 2 shnong ban bishar hok set shi jingim ïa u nongpynïap briew

Ki paidbah ha Nongstoin kiba dawa jingbishar hok

Nongstoiñ, Nailar 31: Ka Rally bad jingialang paidbah ba la khot pynlong da ki artylli ki shnong kata ka shnong Nongstoin bad Tiehsaw halor ka jingshah pyniap dusmon i Mei-ieid Phlesis Syiem (Bam kwai ha dwar u Blei) 79 snem ka rta na ka shnong Nongstoin bad I samla Maitlynti Lyngdoh Marshillong ( Bam kwai ha dwar u Blei) 25 snem ka rta napoh ka shnong Tiehsaw, ka la dawa na ki bor jong ka aiñ ba ki dei ban ai ka jingbishar bahok da kaba set along shi jingim ia u Banphrang kupar Nongbri uba dei u riew thrangsnam uba la pyniap dusmon ia kitei ki arngut ki riew kynthei.

Ha katei ka sngi, ia ka jingiaid rally la sdang na kitei ki artylli ki shnong kiba la iakynduhlang ha Nonbah bad nangtei ki la bteng ia ka jingiaid paidbah ha kylleng ka sor Nongstoin bad pynkut pat ha ïew Nongstoin da kaba pynlong ruh ia ka jingialang paidbah ha katei ka jaka.

Ki nongkren kiba la ai jingkren ha katei ka sngi ki kynthup ia u Bah Moonshine Dkhar, sordar ka shnong Tiehsaw, Bah Wallamkupar Marwein, Acting Sordar ka shnong Nongstoin bad u Bah Esmilan Lyngdoh, sordar barim ka shnong Nongstoin uba la pyniaid ruh ia ka jingialang.

Ka sur kaba la mih na ka jingialang ha katei ka sngi ka long ba dei ban ai ka jingbishar bahok da kaba set along shi jingim ia u riew thrangsnam uba ka shim ia ka jingim jong ki arngut ki riew kynthei hapoh ka shnong Nongstoin kaba la ja ka ka 24 tarik mynta u bnai.

Haba kren ha ka jingialang ha katei ka sngi, u Bah Wallamkupar Marwein, Sordar jong ka shnong Nongstoin u la ong ba kane ka dei ka jingjia ba nyngkong duh hapoh ka shnong bad wat ha ka thaiñ ba u runar un dkhat jubor ia ki artylli ki mynsiem ba kordor ha kajuh ka por bad ha kajuh ka jaka. U la ong ba kane ka jingjia ka la pynsngewsih bad pynshong syier ruh ia ka shnong ka thaw ha kaba ki paidbah nongshong shnong kim nang shuh ban thiah ban dem namar ka jingsngew ngiew ia katei ka jingjia.

U la ong ba kane ka dei ka sien ba nyngkong bad kan dei ruh ka sien ba khatduh ba kum kane ka jingjia kan wan jia hapoh ka shnong ka thaw, namarkata kum ki nongshong shnong ki dawa na ki bor jong ka aiñ ba dei ban set along shi jingim ia une u riew thrangsnam namar ngim kwah shuh ban dang iohi ia u ha ka imlang sahlang.

Katba na ka liang u Bah Moonshine Dkhar, sordar ka shnong Tiehsaw u la pynpaw ba ki artylli ki Dorbar shnong ki pynrem jur halor kane ka jingleh dusmon jong u riew runar bad ki dawa ba ka tnad pulit kan pynngat ia u ha ki kyndon ba tyngeh bad ha kajuh ka por ki kyntu ruh ia ka kashari ba kan pynshitom da kaba set along ia u shi jingim.

U la ai ruh ka jingiaroh ia ka tnad pulit WKH hapoh ka jingialam jong u S.P, Bah Herbert G. Lyngdoh bad Bah Banteilang Kharjana, DSP Headquarters ryngkat ka kynhun kiba la trei shitom bad ioh ban kem ruh ia u nongkam sniew tang hadien katto katne por ba la jia katei ka jingjia.

Previous articleDa ka jingthoh pan ka JACAUHEP na u James ban pynsangeh den wah Umngot
Next articleÏoh pyllait ki pulit ïa ka khynnah 13 snem, kem ïa uba kynnoh rahbor