Byrngem ther bom ka China ïa ka Japan ba mushlia ïa ka Taiwan

Ka liengsuiñ thma ka China

Beijing, Naitung: Ha kawei ka Video kaba la pynlait paidbah ha ka lad pathai khubor jong ka China ka Communist Party, ka sorkar ka la byrngem ban bteng ther  bom pyrshah ïa ka Japan halor ka jingtuklar bad mushlia jong ka ha Taiwan, ong ki khubor kiba la ïoh lum na ki lad pathai khubor ka Fox News.

Katei ka video kaba tang san minit ka dei kaba la peit da palat ar million ngut ki briew ha China, ong ki khubor kiba la ïoh lum na ki lad pathai khubor ka Xinhua.

Katei ka video ka dei kaba la weng noh hadien katto katne por, hynrei ka la don ka jingshna tuh ïa katei ka juh ka video bad la pynlait ha ka YouTube bad Twitter da ki katto katne ki briew. 

“Ngin pyndonkam shwa da ki niwkliar bom,” kdew katei ka video.

“Ngin bteng ban pyndonkam ïa ki niwkliar bom man la ka por. Ngin bteng ban leh ïa kane tad haduh ba ka Japan kan pyndem ïalade ha ka sien kaba ar.

Ka CCP ka la pynpaw ba kan trei lang na ka bynta ka Taiwan, bad ka la kynthoh ïa ka Japan halor ka jingphah jong ka ïa uwei u shipai, kawei ka liengsuiñ bad kawei ka jhad sha katei ka dewlynnong.

Katei ka jingbyrngem ka la long hadien ba ki shipai ka Japan ha ryngkat u Symbud Myntri Rangbah duh jong ka ri u Taro Aso ha ka taïew kaba la dep ki la ong ba ki dei ba ïada ïa ka Taiwan, kdew ki khubor kiba la ïoh lum na ki lad pathai khubor ka The Japan Times.

Wat lada kitei ki ar tylli ki ri ki la synshar ïa katei ka ri ha ki bun bun snem kiba la dep, hynrei ka Beijing ka la kam ba ka don ïa ka hok kaba pura ban khmih ïa ka Taiwan, ka ri kaba don haduh 24 million ngut ki nongshong shnong bad ka dei kaba don ha ki thaiñ shathie jong ki khap duriaw ka China.

Ka Taiwan, ha kawei ka liang ka dei kaba ïaleh pyrshah ïa ka China bad kaba pyrshah ïa ka jingpynïadei kam bad ka jingpynkhlaiñ ka jingïadei bad kiwei ki ri ba khlaiñ bor kum ka United States.

Ka China ka la byrngem ruh da kaba ong ba ka jinglait luid jong ka “Taiwan bad ki nongshong shnong jong ka kan wanrah ïa ka thma kaba shyrkhei”.

Previous article19 tarik Naiwieng yn sdang ka ISL 2021-22, pynlong biang ha Goa
Next articleMih 5 ngut ki thei pyniriam ba kynnoh pyrshah ïa u Raj Kundra halor ki phlim dakaid