Bynñiaw u Bah Lovely ba sdang jah ki kaitor Khasi katba dang mih ki sngi

U Bah Lovelystar Khriem.

Shillong Nailur 21: Katba dang mih ki sngi bad ki por ki nongrwai Khasi ki la sdang ban jah noh na ka daw jong ka jingeh kaba ki ïa kynduh, la ka dei ha ka jingbymdon ki nongïarap bad ki nongkyrshan ki ban ai mynsiem ba kin lah ban ïaid sha khmat ha ka jingrwai jong ki.

Na ka liang u Peitngor u la ïoh ban ïa kren bad u Bah Lovelystar Khriem  u ba dei na ka shnong Jongksha, u Bah Lovelystar u dei u wei na ki kaitor ba la paw bha ha ka jylla, u long u nongthaw jingrwai u ba kham pher na ki wei pat ki nongthaw jingrwai khasi.

“Mynshuwa u sngewtynnat ban sngap ïa ki jingrwai Khasi bad haba u kynud ki paralok ki ong ba u don ka ryndang kaba biang, kane ka ai mynsiem ïa u bad ha man ba ki don ki prokram hapoh shnong poh thaw ki khot ïa u ban ïa don bynta lang.”

U la bynrap ruh da kaba ïa thuh ba ha ka por ba u dang khynnah, u lah ban pynïahap tara bha, bad suki suki ha ka jingdon jong ki paralok ki ba rwai, kine ki la khot ban leit rwai ki khot sha All India Radio, ka jing leit ïashim bynta jong u ha AIR ka la btin lynti ïa u ban ïoh ban ïa don bynta bad kiwei ruh de, ki ba la khot ïa u ban rwai.

“Nga la ïa shim bynta ha ka prokram jong ka North East Network, Monolith Festival, ngam da dei eh u ba paw hynrei ha ki kato katne ki prokram nga la ïoh lad ban ïa shim bynta,” U la ong.

Kham ñiar ban shem ïa ki nongthoh jingrwai ban thoh hashen ïa ka jingrwai bad ban rwai, hynrei na ka liang ka jong u Bah Lovely u lah ban thoh hangto hangto bad ban rwai. “Nga lah ban pynïahap tara hangto hangto, ngam sngewthuh kumno nga lah, hynrei kane ka dei ka jingai jong U Blei, nga ïohi ba ki briew ki kham sngewtynnat ban sngap lada ngi lah ban thaw hangto hangto hi,” u la ong.

“Nyngkong eh nga sngewtynnat ban thoh ïa ki jingrwai biria, hadien pat nga la phai noh bad pylleit jingmut ha kaba thoh ïa ki jingrwai ki ba ïa dei bad ka imlang sahlang. Nga la thoh  ruh ïa ki jingrwai haba ïa dei bad ka jingshah sloit bor noh jong ki shynrang ha ka imlang sahlang, ka jing knieh noh ïa ka bor da ki kynthei, ki jingrwai haba ïa dei bad ka Mariang bad ki don ki jingrwai ki ba dei halor ka jingïeit ruh,” u la ong.

Haba ïa dei bad ki jingrwai kiba u la rwai don haduh 50 tam  eiei ki ba u la rwai ha kylleng bad napdeng kine phra tylli u la dep ban leh ïa ka recording ki don ki jingrwai kiba u rwai ha ka por ilekshon, ki jingrwai kiba dei bad ki prokram kiba shi sngi kiba u la thoh bad rwai. “Nga sngewthuh ba ka da ka ba pynlut por ban thoh jingrwai kam poi sha eiei ruh bad nga sngewthuh ba kam don jingim ban pynlut por tang ban thaw jingrwai,” ong u Bah Lovelystar.

Na ka liang u Bah Lovelystar u la pynmih ruh ïa kawei ka thup jingrwai kaba u la ai kyrteng ‘Ki Mawkordor,’ ha ka jingim jong ngi, ngim lah ban ïa khlad bad ka rwai ka siaw namar  ngi ïohi ba haka ki paidbah ki leit sha lum sha wah ki kynud ïa ki jingrwai, ki rwai ki siaw bad ki klet ïa kiei kiei baroh. U la ong ruh ba lada ïoh ban kren lyngba ki sur jingrwai paidbah ki kham shah shkor laka dei ha ka sneng ka kraw ne ha kiwei kiwei ruh ki bynta, ban weng ïa ka jingrwai na ka jaitbynriew jong ngi te ngim lah namar kala long doh longsnam ha ngi.”

Shuh shuh u la ïathuh ruh ba na ka liang ka jong u, u la thoh ruh ïa ka jingrwai haba ïadei bad kane ka pakhang shnong, ïa kane ka jingrwai u la thoh namar ki paralok jong u ki kyrpad ïa u ban thoh, u la thoh ïa kane ka jingrwai halor ka jingtieng ba ki paidbah ki don haba ïa dei bad kane ka jingpang khlam, u la bynrap ruh da ka ba ong, “Ki nongtrei ha ki tnat ka koit ka khiah ki ïa kynduh jingeh haba ki wanphai ha ki shnong ki thaw namar ki shnong kim shah shuh ïa ki ban wanphai kane ka wanrah jingeh ïa ki shaei ki sah lada kim shah ban wan phai, ki nongtrei ka koit ka khiah ki wan phai sha ïing sha sem hadien ba ki la dep leh ïa ka test, ngi dei ban kyntu ïa ki nongshong shnong ba ym khang ïa ki hynrei ban shah ïa ki ban wan sha la ki jong ki ïing ki sem.

“Kat nangmih ki sngi ki nongrwai khasi ki jah noh,” u la ong.

“Naduh ba mih kane ka juk ba mynta bad ki kor ki bor ba mynta ki jingrwai Khasi kila sdang ban jah noh, bun na ngi ngim kwah ban ïa rap ïa ki ba don sap, dei halor kane ka nongrim ba ki nongrwai Khasi ki shem jingeh ban im daka ba rwai bad ki sa iehnoh, Nga kyntu ïa ki paidbah ka bri u hynñiewtrep ban ai jingkyrshan lem ïa ki nongrwai khasi la ka dei hakano kano ka rukom ruh khnang ba kan ïai neh,” ong u Bah Lovely haba pynkut ïa ka jingkren jongu.

Previous articleKyntu ïa ki paidbah ban long kiba husiar | Bun ki briew ki shah thok ba thied jingthied online: SP
Next articleLait thaw na ka ïap u heprit 6 snem ba hap hapoh pung ha Mawryngkneng