Bteng sam marbam ka Child-Line sha ki longïing ba don khyllung ha Ri Bhoi

Ki dkhot ka Child Line kiba ai jingiarap

Nongpoh, Naitung 19: Kum kawei ka lad ban tynrong lem ïa ka khia ka shon jong u paidbah ba bun balang khamtam ha kum kane ka por ba dang lynshop ka khlam COVID-19, ka tnat Child Line jong ka Nongpoh kum ka tnat kaba peit kyrpang ïa ka eh ka shon jong ki khyllung khynnah, mynta ka sngi ka la bteng biang ïa ka kam shakri paidbah da kaba pynpoi ïa ki marbam mardih sha kumba 15 tylli ki longïing kiba don ruh ïa ki khyllung ha kine ki longïing.

Kane ka kynhun jong ka Child Line jong ka Nongpoh kaba la ju shim ïa kane ka bynta ban shakri paidbah ha kum kane ka por kaba khim khait, mynta ka la hiar pat sha ka shnong Nar-ang ha 20 Mer Ri Bhoi District ha kaba na ka liang kane ka tnat la lamkhmat da ka Kong Ibanshisha Marpna, Centre Coordinator lem bad kiwei kiwei ki nongtrei jong kane ka tnat ha kaba la sakhilang ruh da ka jingïashimbynta da u Rangbah Shnong jong kane ka shnong.

Haba kren ha kane ka sngi, ka Kong Ibanshisha Marpna, ka la pynpaw, ba ka tnat Child Line ka dei ka tnat kaba trei ban peit kyrpang ïa ki jingeh jong ki khyllung khynnah khamtam ruh ïa kito kiba shem jynjar ha kiba bun ki liang, kum ka tnat hi hadien ka jingtip ba don bun ki longïing kiba don hapdeng ka jingkyrduh khamtam kito ki longïing kiba don ruh ïa ki khyllung khynnah ha la ki ïing ki sem kumta la shim ïa kane ka bynta ban pynbiang katba lah ki jingdonkam la ka dei ha ka liang ka bam ka dih bad kiwei kiwei.

Kum kawei ka nongpeit nongkhmieh ïa ka tnat Child Line ha Nongpoh, ka la kyrpad ruh ïa kito ki longïing kiba don ki khun rit ha la ïing ha la sem ba kin long kiba phikir bha ha kum kane ka por khnang ban lait na ka jingshah ktah ha kane ka jingpang khlam COVID-19 bad ruh ban bud thik ïa ki jingbthah jong ka sorkar jylla bad ka tnat ka Koit ka Khiah.

Previous articleKan ym don jingmut ka jingwan u Amit Shah lada um treh ïakren ILP: Bajop
Next articleShah kynnoh donkti u tnga ka Shilpa Shetty ba pynmih phlim dakait, kem ki pulit