Artatien ban ïoh pynlong National Games 2022 ka Meghalaya

Watla ka sorkar Meghalaya ka la ïaid shakhmat ban pynkhreh na bynta ban pynlong ïa ka National Games 2022, hynrei dang artatien ïa ka jylla Meghalaya ba kan ïoh pynlong ïa ka katei ka lympung bah ka ri ha u snem 2022, namar haduh mynta ka Indian Olympic Association (IOA) kam pat lah ban rai ne pynthikna ha ka jylla aïu ka kwah ban pynlong ïa katei ka lympung bah ka Ri.

Dang shen u President ka Indian Olympic  Association (IOA) u Narinder Batra ha ka taïew ba la dep u a kular bad mynjur ban pynlong ïa katei ka lympung bah ka Ri ha West Bengal haka jingïalang pynkup burom ïa ki nongïalehkai jong ka West Bengal Olympic Association, kane ka jingkren jong utei u heh ka IOA ka long kumba pynduh mynsiem ïa ka sorkar Meghalaya bad khamtam ïa ka tnat ïalehkai bad ki synjuk ïalehkai ka jylla kiba la trei shitom bad pyrshang ban wad ïa ki lad ki lynti ban pynlong ïa katei lympung bah hapoh ka Jylla Meghalaya. Kumba ka long haduh mynta, ka don ka jingïaknieh hapdeng ki jylla ka Ri ban ïoh pynlong ïa National Games 2022, kita ka Chhattisgarh, Uttarakhand, West Bengal kynthup ka Meghalaya kiba paw kyrteng shakhmat. Ka Meghalaya ka da angnud dik dik ban ïoh pynlong ïa katei ka lympung bah bad ka la ïaid shakhmat ban pynkhreh ïa ki kam, hynrei ka IOA i kumba ka dang leh kyllaiñ halor kane bad kam pat ai ka rai ba thikna ïa ka jaka ban pynlong haduh mynta bad kane ka pyni ba ka IOA ha kaba kut kan phaikhmat sha ki jylla kiba la bit la biang ki jaka ïalehkai ban pynlong ïa ka NG 2022. Halor kane u Myntri Rangbah ka Jylla u Conrad Sangma, dang shen u la pyntip ba ka sorkar kan pynlut kumba T.450 klur ka pisa ba la ïoh lyngba ki tnat treikam bapher bapher na ka sorkar pdeng. hynrei kan shem jingeh bad kan kynduh mawsiang ban pynïaid beit ïa ki kam ki jam namar ka hap ban shaniah katba ai ei ka sorkar pdeng.

U Myntri Rangbah ka jylla u Conrad Sangma ryngkat u Myntri ka tnat ïalehkai ka jylla Bah Banteidor Lyngdoh, ki la shim khia ban wad ïa ki lad ki lynti ban pynlong ïa katei ka lympung kaba jop ban wanrah burom ïa ka jylla. Ka la thaw ruh ïa ka Organizing Committee ka ban khmih bad pynïaid shakhmat ïa ki kam na bynta ban pynlong ïa ka National Games 2022.

Kumba long haduh mynta, ka paw ba ka sorkar jylla ka tlot bha ka rukom treikam namar kam pat lah ban sdang ban shna ïa ki stadium ne ki jaka ïalehkai, namar ka jinghiran ka pla pisa bad ka jingïakren ka dang ïaid tang ka ktien na bynta ban pynlong ïa ka National Games, na ba ka hap ban shaniah thylli ïa ka sorkar pdeng ban ïoh pisa ban ïoh pynlong ïa katei ka lympung bah ha jylla. Namar tang ban wad ïa ki jaka ruh ka shim por da ki bnai ki snem ban ïoh jaka bad don ki jaka ba ka sorkar ka la ïoh ruh ka hap ban pynphai kylla na ka daw ka jingïapher jingmut hapdeng ki trai jaka ne ki nongshong shnong kumba la jia ha Pomlakrai. Na ka liang ka sorkar jyllla, ka la dep ban plie ïa u maw nongrim ban shna ïa ka madan ïalehkai National Games ha Pomlakrai, hynrei ki trai jaka bad ka shnong ki la kylla ktien noh hadien namar ba kim sngew ïahab ïa ki kyndon ba la pruid dak ka sorkar ban shna madan ïalehkai ha katei ka shnong bad ka long tang ban shu pynsyrwa kai ïa ka pisa da ki lak tyngka ban plie don burom ïa utei u maw nongrim khlem seisoh.

Bad haduh mynta ka sokar jylla, kam pat lah pynthikna ha ei kan shna ïa ki madan ïalehkai bad ka dangïai wad hi, bad ym lah ban ban tip katno tylli ki madan ïalehkai na ka liang ka sorkar jylla ka la lah ban pynthikna na bynta ban pynlong ïa ka National Games, nalor ka Mawdiangdiang kaba la pynthikna hynrei ka dang ïaksaid ban wad shuh shuh sha kiwei kiwei ki jaka. Kumta, ka sorkar Meghalaya ka shem jingeh ba kan lah ban pynbiang ïa ki jingdonkam baroh ban ïoh pynlong ïa ka National Games, wat lada kan pyntrei da ki kor ki bor saïan kat kum ka juk stad mynta ban pyndep ha ka por ba la buh, namar ka por ka long tang hapoh ar snem duna.

Namar katkum ki kyndon ka dei ban pyndep ïa ki jaka ïalehkai shwa ka por ba la buh, kata hynriew bnai ba ki khynnah ïalehkai na ka jylla kin ïoh lad ban pyrshang bad ban kilan met ïa lade. Halor kane ka sorkar jylla, ka la dei ban sdang noh kham kloi ban shna ïa ki madan ïalehkai khnang ba khynnah na ka jylla kiba shim bynta kin ïoh ban kilan ban pynjanai shuh shuh ïa ka sap ïalehkai jong ki ban ïoh khur takma ha katei ka lympung bah ka Ri India, kata shwa ba kiwei ki kynhun ne ki nongïalehkai na shabar jylla kin wan ban ïuhkjat ha ki jingïalehkai pyrshang na bynta ki jingïakhun bapher bapher.

Previous articleÏai sawa da ki spah tylli ki jingkren phone ha ka shi sngi na ki nongbylla ba dang sahkut Kiba dang kyrpad jingïarap: Sonu Sood
Next articleUjor ka kurim ba mynshuwa jong u Peter, pyrshah ïa ka jingïathoh bad ka Vanitha