Ai kor Kompiwter u MLA nongpoh sha ka RBTEDF

Ki dkhot ka RBTEDF lem bad u MLA

Nongpoh, Nailur 08: Ban kyrshan lem ïa ki jingdonkam jong ka kyn-hun ki nongieid mariang ban kyntiew ïa ka kam jngohkai pyrthei ha ka them Ri Bhoi kaba la tip kum ka Ri Bhoi Tourism & Environment Development Forum (RBTEDF) u MLA ka Nongpoh Konstituensi, u Bah Mayral Born Syiem mynta ka sngi u la leit ban ai sngewbha da ka kor komputor bad ruh ki sher dara (tent) sha kane ka kynhun.
Ha kane ka jingleit ai sngewbha jong u MLA ka Nongpoh sha ki dkhot ka RBTEDF la sakhilang naduh u Chairman kane ka kynhun ieid mariang u Bah Plielad Tiewsoh, u Bah Marvelous Pde, Secretary lem bad kiwei kiwei ki dkhot jong kane ka kynhun.
Haba kren ha ka pro-kram lyngkot, u Bah Mayral Born Syiem, nyngkong eh u la pynpaw ïa ka jingkmen ban ïoh ban ïa don bynta lang ha ka jingthmu jong ka kynhun RBTEDF lyngba kine ki jingai sngewbha kiba lah ban kyrshan ïa ka thong jong kane ka kynhun kaba don ïa ka thong ban pynneh pynsah ïa ka mei mariang bad ban kyntiew ruh ïa ki jaka kiba itynnad ban khring ïa ka kam jngohkai pyrthei ha kane ka them Ri Bhoi District.
U la ong ruh, ba kam long kaba suk ïa kane ka kynhun ban pynurlong ïa kino ki jingthmu bad ki jingwad bniah kiba la lum la lang khlem da don ki kor ki bor ba paka ban pynneh ïa kine ki jingtip hashwa ba kin pynpaw pyrthei pat ïa ka jingshem ka jong ki, kumta ka kor computer kan long kawei ka lad ïa kane ka kynhun ban pynlang ïa kita ki jingtip ba ki la lum na kylleng ki jaka jong kane ka district.
U Bah Syiem, kum u nongmihkhmat u la kitbok kitrwiang ruh ïa kane ka kynhun ba kan nang kiew shaphrang ha ka jingpyrshang ka jong ka ban kyntiew ïa ka kam jngohkai pyrthei lyngba ki jaka kiba itynnad kiba don ha kane ka district, ha kaba kum u nongmihkhmat u la kular ruh ba un nang ïai don ryngkat bad kane ka kynhun ha kano kano ka bynta kaban ai mynsiem ïa kane ka kynhun.
Na ka liang u Bah Plielad Tiewsoh, kum u Chairman ka RBTEDF, u la pynpaw ïa ka jingsngewnguh kaba khraw bad ruh ban ai ka jingïaroh ïa u MLA ka Nongpoh Konstituensi, u la long ba kloi ban ai jingïarap sha kane ka kynhun bad ban ai mynsiem halor ka jingpyrshang ka jong ki ban pynneh pynsah ïa ka mei mariang bad ruh ki jingitynnad ka jong ka ban khring ruh pat ïa ki nongjngohkai pyrthei kaba dei ka jingthmu kaba hakhmat eh jong kane ka kynhun.

Previous articlePalat 200 ngut rung NPP ki nongkyrshan Congress bad HSPDP ha Rambrai
Next articleKlet noh shwa ïa ka shuki, ïatylli na ka bynta ka Jaitbynriew: GS UDP