Ai Dorkhas ka KSU ba thut ka Network Jio

Ki nongialam ka KSU Nongthymmai kiba dang ai dorkhas ha u heh ka Jio

Shillong Naitung 20: Ka Khasi Students’ Union (KSU) Nongtyngur Unit hynne ka sngi, kila leit iakynduh ia u Bah Andy Rayner Lyngdoh, Assistant Manager ka Jio Telecom, hapoh ka Ophis jongu kaba don ha Fire, Brigade Shillong ban pynpaw ia ka jingeh kaba iakynduh da ki khynnah bad samla halor ka jingtlot palat ka Network jong ka Jio.

Ha katei ka jingiakynduh la don ryngkat u Samla Richard Mawkhiew, General Secretary KSU Nongthymai Circle bad ka KSU kala aiti ïa ka shithi ujor halor ka jingtlot palat ka Jio Telecom ban ai ia ka jingshakri ha ka dong ka thaiñ kaba buh ha ki jingeh kiba khraw ïa ki paidbah kiba pyndonkam bad khamtam ki khynnah pule kiba shaniah tylli tyllang ha ka Internet ia ka jingpule bad ka eksam jongki ha kum kane ka por u Khlam COVID-19.

Ka seng ka pynpaw ruh ba kala ujor la bunsien lyngba ki kyrwoh kiba lah phah lyngba ka Email, WhatsApp bad ka jingkren lyngba ka phone ïa ki nongtrei ka Jio kiba khmih ia ka dong ka thaiñ hynrei kim shim la shimkhia eiei ia ki jingujor.

Hadien ba ka Seng ka lah dep ban pynpaw shai ia ki jingeh, na ka liang une u Assistant Manager ka Jio Telecom u lah kular skhem ba katba lah yn pyrshang kham kloi ban pynbit pynbiang ia ki jingdonkam baroh kiba iadei bad kiba mih na ki jingthut ki tiar ki tar bad ki kor ki bor kiba iadei bad ka jingbym treikam ka network.

Ka KSU ka la kren shai ba lada ka Jio Telecom ka iai leh bym suidniew halor ki jingujor, ka seng ruh kan sa shim noh da ki sienjam kiba kham tyngeh bad wat haduh u pud ban khang tala shisyndon ia ki Tower kiba don hapoh ka dong ka thaiñ. Kane ka long katkum ka kyrwoh na u samla Therbor Khongtani, General Secretary KSU Nongtyngur Unit.

Previous articleLah ban kyrduh um ha ka thaiñ Nongpoh ba twa u lum
Next articleLai sngi yn khang ki sengbhalang ïa ki nongtrei ka ophis DMHO