99.9 percent urlong ka jingai injek COVID: AL Hek

Shillong, Rymphang 16: U Myntri ka koit ka khiah u Bah AL Hek hynne ka sngi Hatmajai u pyntip baka phase banyngkong jong ka jingaidawai COVID-19 ka la ïoh ïa ka jingjop kaba 99.9 percent bad ka jingpynrung kyrteng ïa ka phase kaba ar ka dang ïaid shaid shaid.

“Ngi la lah ban pynurlong ïa ka thong bad 99.9 percent ngi la ïoh ïa ka jingjop haba ai injek covid,” ong u myntri ka koit ka khiah.

Haba tohkit la ka don ne em ki jingujor ba kin don kiba shah ktah na kane ka jingai injek COVID-19, u myntri ka koit ka khiah u la ong ba ki don kai tang malu mala, ha kaba iwei ne arngut ki la khie shit bad kim don ka jingujor kiba heh.

Ha ka phase kaba ar jong ka jingai injek, u Bah AL Hek u la ong, “Ka jingpynrung kyrteng ka dangïaid shaid shaid ha ki sub centre kiba pher bapher, ki Community Health Centres, Public Health Centres naka bynta kiba la san ruh kumjuh “.

Haba tohkit haduh katno ngut ki buh thong ban ai injek ha ka phase kaba ar, u Bah Hek u la ong, “Ngim lah ban ong katno ngut yn ai injek, namarba ka jingpynrung kyrteng ka dang shu sdang “.

Ka sorkar Meghalaya ha ka phase banyngkong, ka la ai injek kumba 16,000 ngut ki nongtrei ka koit ka khiah napdeng ki 27,000 ngut kiba ki la ithuh. Kiwei ki shiteng ki la ai ha ka bynta kaba 2 jong ka phase I.

Hadien ka jingai injek jong ki nongtrei ka koit ka khiah, ka sorkar kan pynleit jingmut ïa ki nongtrei ba hakhmat eh, ïa ki nongtrei municipal, ki pulit bad ki paidbah kiba trei ha ka disaster management.

Ha ka phase kaba lai, ka sorkar kan aijek ïaki paidbah kiba 50 snem shaneng bad na ka bynta kito kiba don jingpang kawei ar tylli ha ki.

Ka jingai injek ha ka jylla ka la sdang ha 16 tarik u Kyllalyngkot ryngkat bad ka ri India bad ki nongtrei ka koit ka khiah ki la ïoh ïa ki injek Covishield banyngkong.

Previous articleHap i khunlung ha jaka bret jaboh, ujor ki sengbhalang, kyntait ka Hospital
Next articleKi kali ha Ri Bhoi ruh kin kamai mynta